經紀發動遊行 抗議再縮午飯時間

【明報專訊】喺中環食餐飯，要幾長時間先至夠用呢？香港證券及期貨從業員工會，噚日就呼籲證券經紀同業，喺下周四遊行抗議，反對港交所再縮短佢哋嘅飯鐘時間半個鐘，令到佢哋得番一個鐘食午餐。
工會會長林德明噚日話自己相當憤怒，家已經到咗「業界存亡 匹夫有責」嘅關鍵時刻，仲請埋立法會議員王國興嚟撐場，批評港交所唔徵求業界意見就倉卒行事嘅做法，「絕對唔可取，反而會打擊香港聲譽，影響正常運作。」
王國興話，大家都知中環「揾食難」，食飯地點少，證券經紀唔係話交易暫停即刻就可以走出去食飯，港交所一意孤行令到班經紀匆匆忙忙狼吞虎嚥咁用餐，對健康有礙，「非常不人道、絕對唔合理！」林德明就懇請港交所畀出有說服力嘅理據，如果唔係，會令中產再向「下流」。