地方冇錢 西安公路爛尾

【明報專訊】中央舊年又要搞民生，又要壓樓市，搞到地方政府大感頭痛，事關開支多咗，但賣地收入又少咗。喺「缺水」之下，部分地方基建工程要面臨拖長工期，甚至暫停嘅風險。


好似西安市咁，當地前排起咗條雙向六線行車嘅新馬路，但唔知點解前兩日畀人用磚同建材垃圾攔腰封咗成條馬路，唔少駕車人士行咗一大段之後先發覺馬路被封，搞到要掉頭，費時失事。


無啦啦一條新馬路點解會被人封咗呢，當地人就話，鋪設馬路塊地係向村民租番嚟嘅，但係承建商拖欠村民租金，仲有兩個政府部門亦都欠村民債，多次催促都拎唔到錢之下，村民先至出此下策，將馬路封堵。


原本搞好交通網絡，對市民而言係件好事情，但係家搞到爛尾，便民變擾民之餘，已經起好咗嘅路段亦失功用，白白浪費公帑。