吉之島認叻 新店令樓價漲三成

【明報專訊】舊年港府開始出招遏抑樓市升溫，所以呢排樓市都淡淡靜靜，做緊業主考慮賣樓嘅當然唔係幾開心，不過，原來屋苑附近開個百貨公司，都可以帶旺樓市。今日吉之島喺荔枝角碧海藍天嘅旗艦店就會開幕，噚日吉之島帶啲記者參觀新店時就話，由舊年中公布喺上址開店，到依家附近樓價足足升咗兩至三成喎。


荔枝角都有唔少屋苑，包括「西九四小龍」碧海藍天、宇晴軒、泓景臺等等，噚日吉之島母公司永旺百貨董事總經理林文鈿就話，呢個區有一萬個家庭以上，帶來嘅消費力強勁，由於嗰區無街市，所以啲街坊都好高興吉之島來開店，仲話有街坊反映吉之島帶挈區內樓價上升。


林文鈿話由舊年年中公布喺荔枝角開店，到家周邊嘅屋苑樓價平均都升咗兩至三成，所以吉之島除咗方便咗居民，更加令到業主開心咁話喎。