農行無守約 畀客告

【明報專訊】將錢存入銀行，除咗安全就係想賺吓息，但係響河北省一個叫青縣嘅地方，有兩個原本想存錢賺息嘅內地人，最後賺來嘅係一肚氣。


話說，響20年前農行（1288）青縣支行推出咗個20年期高息儲蓄計劃，兩人就分別將2000蚊同600蚊存入，照計20年後就可以得到9萬幾蚊同2萬幾蚊。於是響2009年，兩人就開開心心咁諗住去農行拎錢兼收息。


點知農行同佢哋講，話因為後來人行有規定限制存款利息同存款年期最多只可以5年，所以唔能夠畀番當年承諾嘅金額，最多只可以按家嘅計法畀錢，最後兩位分別得番9000幾蚊同2000幾蚊，只係當年承諾嘅十分之一，佢哋一怒之下，決定將農行告上法庭。


事件曝光後，有網友就批評農行對件事嘅處理手法唔係咁恰當，事關兩筆存款都係響人行新規之前就已經存入，再者你話要按新例計息，都好應該及早通知存戶，而唔係等到期之後存戶去拎錢，先至話唔能夠兌現咁冇口齒。