單日上市新股創紀錄 5企迫爆港交所

【明報專訊】四隻新股齊齊掛牌，加埋德銀嘅ETF，噚日總共有5間公司登陸港交所，創下單日最多新股掛牌嘅歷史紀錄，搞得噚日朝早交易大廳異常熱鬧，人聲嘈雜，辛苦晒班公關，又要照顧賓客，又要睇實上市公司老總，以免「走失」。


華眾（6830）嘅公關同小琴講，好彩影相次序係按照公司名嘅拼寫安排，如果唔係，都擔心到咗影相環節，要拉高音量呼喚老總。開市前一分鐘，到咗今年啱啱推出敲鑼儀式，原本極有氣勢嘅環節，遇到5位老總，一人一條木棒，敲鑼嗰一刻，前前後後Bang咗唔知幾多聲，都幾尷尬。


不過，呢兩日港股升番啲，4間公司就算上市撞期，都算係幸事。開世中國（1281）執行董事姜淑霞就話，自己都覺得好好彩，無怪乎上市首日股價就升咗12個巴仙。