「恒指之父」家人助圓心願

【明報專訊】「恒指之父」關士光上個月尾喺加拿大過咗身，好多業界老行尊都相當惋惜，佢生前曾經出版過兩本書，小琴早排就同關老先生侄女Nicole（關慧中）傾過偈，原來關老先生臨終前仲寫緊第三本書，講述佢嘅生平同香港變遷，本書仲已經完成咗八成，Nicole話佢而家同家人傾緊，希望可以接手完成呢本書，幫關老先生完成呢個心願。
關老先生生前出版過兩本書，分別係用中文撰寫嘅《七十年來家國——一個老香港的回憶》，之後喺Ｎicole協助之下豐富咗好多資料，包括當年創立恒指嘅一啲經過，完成咗英文版，書名叫《龍與皇冠——香港回憶錄》（The Dragon and the Crown-Hong Kong Memories）。
醉心創作 過身前每日寫書
Ｎicole話，《龍與皇冠》喺2008年出版之後，關老先生有個唔識英文嘅朋友問佢點解唔出一個中文版，加上佢老人家醉心寫作，所以立刻又埋頭寫第三本書，之前寫書主要係Nicole負責蒐集資料，呢次佢仲親力親為，親自去同親戚朋友做訪問同做資料蒐集，直到佢過身前一個星期，佢依然堅持每日都寫書，可惜最後都無法寫完最後一個章節。
關老先生呢份手稿而家由家人保管，Ｎicole話本書其實已經完成咗八成，而家一家人仲傾緊點樣處理，佢就話家人當然想幫佢老人家完成埋本書，還佢心願，但家人之間都仲要好好傾傾，希望可以快啲有結果啦。
email:piano@mingpao.com