里昂：龍年股市先潛後升

【明報專訊】上年兔年個市好似隻兔仔咁，跳上跳落，「chok」到不得了。今年嚟到龍年，到底會喺潛龍勿用，定係飛龍在天呢？一年一度嘅里昂風水指數預示，上半年股市尋底，去到年中轉勢急速騰飛。


化身做風水師的里昂證券分析員周子諾話，今年係水龍年，配合龍嘅性情就係喜怒無常，難以捉摸。恒指全年嘅走勢，亦都會好極端，頭兩季好似龍游淺水咁下跌。到咗年中見低位嗰陣，先會以一飛冲天之勢，急速攀升。


水龍年旺航運博彩消費股

話明係水龍年喇喎，梗係旺啲水有關嘅行業啦，好似航運、博彩同消費股等。屬土嘅地產同建材都會唔錯，由於水同土都旺，唔使問阿貴，水泥股仲唔大旺特旺。至於，石油、電訊同電力呢啲屬火嘅股份，喺正水龍年，自然會弱啲。


舊年係本命年嘅兔仔兔女，今年運勢有望兔氣揚眉，愛情事業兩得意。所謂龍騰虎躍，屬虎嘅人今年都過番個吉年。屬牛同屬狗嘅就要小心啲喇，尤其投資嗰陣更加要小心，以免破財。


何文田油尖旺地運最強

睇完個市，梗係要睇埋今年啲樓得唔得啦。分析員高頌妍用玄空飛星卜地運，「吉星入中西北凶」。九龍區何文田、油尖旺等地運最強，天水圍、元朗區多衝突。正北嘅大埔、上水亦多疾病。由於今年太歲位喺正東南，住喺將軍澳區嘅讀者要小心破財喇。


例牌都要講句，風水命理信則有，不信則無。里昂個風水指數，都係畀大家多個參考啫，投資都係要做足功課。不過，小琴可以畀個參考大家，里昂喺書入面主動承認，上年估恒指走勢都係錯嘅多，所以「認真你就輸了」。


email:piano@mingpao.com