顏寶鈴﹕可能買來防輻射

【明報專訊】話咁快距離日本「3.11」東北大地震都差唔多一周年，不過日本方面好多基建都未復原，仲周不時傳出有輻射污染泄漏，睇嚟都要啲時間先解決得到，不過呢場超級大地震都唔係對所有嘢都係負面嘅，好似專賣帽嘅飛達控股（1100），就話舊年喺日本嘅銷售大升五成，可能係因為日本人買帽防輻射。


噚日飛達副主席兼董事總經理顏寶鈴講開，雖然感嘆製造業家好難做，好多同行都轉去做其他賺錢易啲嘅業務，不過自己都唔會放棄。佢又話，舊年飛達日本嘅銷售大增51％，佢笑笑口講，唔知係咪因為啲人怕輻射，所以買多咗帽，又話之前喺日本設計比賽都拎到獎，成績幾唔錯。


孟加拉續設廠 降經營成本

另外，公司之前雖然講過，由於文化差異同工人生產力唔高，有意放棄喺孟加拉開廠，不過顏寶鈴話，喺內地製造嘅成本實在升咗好多，所以都會繼續同孟加拉廠房合作，計劃入股25％當地廠房，製造啲中低端嘅產品，顏寶鈴仲喺初三就飛咗去孟加拉視察，佢話：「孟加拉人工起碼平中國一半，中國人家富裕咗，成日扭計要加人工。」佢話家深圳嘅工人人工3000幾蚊，但係2月開始又加最低工資，啲工人又希望再加人工，真係諗起都抓爆頭。


中國人趨富裕 扭計加人工

佢又透露，家孟加拉廠房產能為一個月30萬件，預計兩年後起碼有200萬件產能，將會佔產量50％，內地廠房就會生產啲高端產品，同埋做研發設計喎。


email:piano@mingpao.com