「牛央」愛股又發盈警

【明報專訊】踏入龍年以嚟，港股升咗唔少，曾經近乎「發爛渣」哋話港股被「無形之手」舞高弄低嘅女股神劉央，心情唔知會否好返啲。不過，人稱「牛央」嘅西京投資主席劉央，佢隻愛股高陽科技（0818）噚日又發盈警，牛央大嗱嗱仲揸咗一成股份，正所謂佛都有火，「神」級嘅牛央會睇到眼火爆，定係有種恨鐵不成鋼嘅感慨呢？


話高陽係牛央愛股，絕對冇誇張，佢曾經話過，睇高陽可以上到10蚊，2010年仲身體力行連番增持，可惜隻股仔唔生性，周不時又發盈警，牛央愈買愈跌，到噚日高陽收市後公布，2010年度出售百富環球（0327）權益獲利，而2011年冇呢個特殊收益，同埋電訊解決方案經營溢利下降，支付解決方案嘅經營虧損增加，2011年業績會見紅……按高陽噚日收市價計，牛央手貨仲值6.2億元，今日開市後就唔知嘞！

近排運氣麻麻 人和又損手

其實牛央近排運氣似乎麻麻，除咗高陽，隻人和商業（1387）長期企喺1蚊樓下，牛央仲揸咗6個巴仙，入貨價介乎1.344至1.484元，人和早排仲有10億元人民幣應收帳逾期未收，搞到之後畀標普、穆迪等評級機構降低評級。


email:piano@mingpao.com