花旗200周年員工齊Jam歌

【明報專訊】中咗，中咗，小琴中咗獎，仲要係現金100萬元咁多！噚日喺花旗嘅春茗活動中，小琴答中咗問題，成為百萬富翁，一心諗住可以打跛腳退休，點知到頒獎時先知，現金獎係100萬越南盾，兌返係400港紙唔夠，退休夢碎。


不過喺初十八呢個好日子攞到大獎，好意頭多於一切，小琴打算即時買返注六合彩，頭獎分分鐘幾百萬元呢！花旗今年咁搞鬼，原因係佢哋成立已有200周年，所以要搞吓新意思慶祝，好似佢地搵來全球1000名來自50個國家嘅員工齊齊Jam咗首歌，唱得嘅負責唱爆咪，識玩樂器嘅，彈琴、吹笛、彈結他能手全部上場，首歌叫做Proud，睇怕都係寓意自豪作為花旗嘅一分子。


既然個個都咁自豪，自然做得耐，小琴聽講花旗香港有個退咗休嘅員工，做咗足足39年，而且現任好多高管，起碼都喺度做咗十幾廿年，今時今日喺金融界仲有啲咁忠心嘅員工，難得難得！