國泰出書 爆空姐待客秘技

【明報專訊】坊間有唔少書，由空中服務員剖白佢哋嘅機上工作點滴，吸引好多捧場客。因為空姐、空少周圍飛，一定遇到好多有趣事，例如遇上麻煩客人、機上突發事件等，讀者都好有興趣知道佢哋點樣處理。國泰航空（0293）不讓他人專美，出版一本空中服務員訓練秘笈。 呢本書由9位國泰訓練導師撰文，將空姐及空少嘅應對技巧，寫成中英對照嘅《藍天心語》，當中更分享真人真事經歷。國泰話唔驚自爆秘笈，會畀人偷師，佢哋希望其他行業，都可以分享佢哋嘅心得。 喺咁多交通工具中，乘客對飛機服務要求最高，所以空姐空少嘅EQ都要有番咁上下，就算遇上無禮嘅客人，要保持禮貌去化解客人的不滿。以前都有傳聞，有乘客係都要攬住名牌手袋喺身，唔肯聽機組人員建議放喺椅底，搞到延誤客機起飛。小琴都想睇吓，導師點教空姐空少化解呢類問題。