唐唐乖仔入里昂實習

【明報專訊】投資銀行界向來係藏龍卧虎之地，唔少豪門家族，都鍾意派子弟入去學吓師，見識吓世面，然之後先返祖家，幫手打理家族生意。小琴前幾日就八到，人人暱稱為「唐唐」嘅本埠政務司長唐英年，都照樣畫葫蘆，叫咗唯一嘅乖仔入里昂證券實習，聽聞仲博得「賓架」（Banker）們嘅好評，大讚虛心好學又勤力咁話。

唐唐獨子唐嘉盛家陣年約22歲，早年喺香港國際學校畢業後即負笈海外留學，前排先返來香港。雖然唐唐家族家大業大，紡織生意早已做到國際化，不過唐嘉盛返到來唔係即刻入廠做其少東，反而走咗去投行捱苦。

小琴聽中環金融圈中人講，「唐唐仔」早前入咗名為法資，實質係土炮嘅里昂，做其「煙盾」（intern）。不過里昂對住呢位大少一啲都無錫住，照樣狂畀嘢佢做，「唐唐仔」基本係朝7晚7咁返工，日日做到無停手。

喺里昂呢幾個月入面，「唐唐仔」基本試勻晒各個部門，由研究部到經紀銷售都有涉獵，有細心嘅基金經理，仲喺其中一份報告中搵到佢嘅大名添。

試勻各部門 獲長工offer

由於「唐唐仔」好學又勤力，里昂入面啲「賓架」都讚不絕口，仲即刻畀咗一份長工offer，希望佢可以繼續效力。不過，聽聞「唐唐仔」仲未正式簽約，因為好似話唐司長太太見唐唐仔咁辛苦，頗為肉痛，仲喺到猶豫緊，畀唔畀個仔繼續做落去。不過，做分析員真係出咗名工時長，一旦入行，見少咗屋企人實在勢所難免。

報料電郵﹕piano@mingpao.com