主席卸責 反邀賓架任財監

【明報專訊】匯源果汁（1886）出現財務違約之後，上周曾邀請一眾債權銀行到北京，同管理層坐低飲杯茶食個包，傾吓點樣解決信貸違約問題。一名有份出席嘅銀行家同小琴講，會面時有銀行家當面向匯源主席朱新禮投訴，話點解當日公司向銀行借錢時，沒講清楚財務狀况，朱主席於是將個波踢畀手下，話都係公司財務總監做得唔好，仲問在場嘅銀行家，有邊個有興趣，可以到公司做財務總監咁話。

銀行家朋友憶述話，朱新禮面對銀行家嘅投訴時，表現得一面無奈，話自己事前並不知情，之後就話，都係公司嘅財務總監做得唔好，而當務之急，係公司要搵到一個好嘅財務總監。朋友話，當時財務總監董穎亦在場，場面尷尬。朱主席呢招以退為進，實在高明。

指現任財務總監「做得不好」

匯源於今年4月籌組一筆總值2.5億美元嘅銀團貸款，有18家銀行參與，當中以台資銀行佔最多。不料，借咗錢之後短短2個月，公司卻出現財務狀况逆轉，令一班銀行家都好㷫，質疑管理層缺乏誠信，明知財務狀况有異情况下，仲將籌組僅2個月嘅銀團貸款，照樣悉數提走。

為咗挽回銀行家嘅信心，匯源在出事之後，邀請貸款銀行到北京與管理層會面，並參觀匯源的廠房，力證公司財務狀况健康，並且與銀行家傾傾，請大家手下留情，放寬負債比率嘅要求，以免匯源立即被追還錢。

報料電郵﹕piano@mingpao.com