中燃股東會搞到要報警

【明報專訊】中國燃氣（0384）股東會一向多姿多采，自從前董事總經理劉明輝被捕後，開親股東會，無幾個鐘都唔會完。不過，噚日有股東因為得唔到管理層滿意嘅答覆，最終搞到要報警，小琴都係第一次見。


自稱曾為傳媒人 為不公義出聲

話說相中人王先生（又名Paul哥）噚日出席中燃股東會，仲着住一件寫上「日本滾出釣魚台」嘅衫。果然呢位Paul哥相當愛國，當主持人用英文講解程序時，佢大聲問「點解大家係中國人，唔講中文」。會內有唔少外籍股東，都畀佢搞到一頭霧水。


其後Paul哥屢次發問，都得唔到管理層回應，佢就愈講愈㷫，愈行愈前，由於佢情緒激動，工作人員上前攔截，佢就話佢受到威脅，要報警求助，仲打爛咗幾隻杯碟。有其他小股東話，公關當時講咗句「要報警搞掂佢」，但Paul哥就話﹕「你要搵警察嚟搞掂我？」結果就先行報警。


中燃梁永昌：小事一件

其實Paul哥問的問題，都係圍繞以前內地媒體報道過啲事，包括話中燃接駁費造假等等。中燃聯席董事總經理梁永昌事後對記者講，呢啲舊聞，6月時已經回應過，家無必要再回應。梁永昌仲話，只係小事一件，佢唔當係乜嘢。


事實證明的確只係一件小事，阿sir嚟到都只係要Paul哥賠番啲杯杯碟碟嘅錢，無拉到任何人。Paul就話，以前都係傳媒人，遇到唔公義嘅事就要出聲。不過，小琴出席過咁多唔同的記者會，即使問問題得唔到答覆，都未曾試過打爛杯碟發泄喎。


email:piano@mingpao.com