梁粉胡曉明掌城大校董會

【明報專訊】政府噚日公布城大校董會新主席人選，就係菱電創辦人胡法光個仔胡曉明，任期由今年10月1號到2014年12月31號。CY參選特首前辭任城大校董會主席，由會計師公會前會長孫德基接棒，佢做咗7個月就加入政府做審計署長，城大校董會家再交另一名「梁粉」負責。


胡係上海市政協常委

活躍政商界嘅胡曉明，除咗係菱電發展有限公司主席，亦係上海市政協常委、香港專業及資深行政人員協會前會長。胡曉明同城大零舍有淵源，唔單止擔任城大校董會成員8年有多，仲喺06年成立獎學金幫城大學生，城大今年頒咗個榮譽院士名銜畀佢。身為特首選委會成員嘅胡曉明，除咗提名CY入閘，競選期間一直幫手站台助選，CY向傳媒宣布文化體育政綱時佢亦在場，可謂忠實梁粉。