蔣麗芸: 我唔係炒樓

【明報專訊】本報噚日報道，喺立法會「新丁」之中，民建聯蔣麗芸Ann物業買賣最活躍，多年嚟累賺逾3000萬，蔣麗芸噚日接受商台節目《在晴朗的一天出發》電話訪問，重申自己係投資，唔係炒樓。但係佢又承認曾經喺完成買賣契約之前，短時間內轉售一間大埔康樂園獨立屋，咁咪即喺「摩貨」囉。


康樂園摩貨轉手

另外，Ann澄清，薄扶林沙宣道獨立屋同埋中半山嘉富麗苑嘅交易，當年係由佢妹妹蔣麗萍持有，同佢無關。根據土地註冊處資料，呢兩個物業由帝譽有限公司購入。帝譽喺1994年購入沙宣道獨立屋，當時帝譽大股東係蔣麗萍，蔣麗芸當時仲未係帝譽股東。不過，帝譽喺1998年以2570萬元出售獨立屋之前，蔣麗芸已經獲妹妹轉讓股份，成為帝譽嘅大股東。帝譽喺1996年購入嘉富麗苑單位，並喺約一個月後賣出，當時蔣麗芸仍未係帝譽股東。


稱如買賣物業會向選民交代

Ann話，唔會承諾出任議員嘅4年任期內唔買賣物業，「你話要承諾不買不賣，我唔敢呀，因為費事我話咗不買不賣，之後喺任期第3年做咗買賣，咁我咪死罪？」但佢強調，任內如無必要不會買樓，「最重要呢啲（物業買賣）唔可以喺秘密，我一定會向選民交代」。