新民黨集思營打晒結

【明報專訊】政黨定期都會舉行集思會、路向營，檢討政黨發展，訂出路向，成立唔算耐嘅新民黨亦唔例外，趁選舉後、立法會開鑼前，喺過去嘅周六、日去咗屯門黃金海岸酒店搞集思營，主席葉劉淑儀、副主席田北辰同行政總裁余衍深同30多個中委等人都有出席。


Emily聽聞今次集思營都有檢討選舉結果，好似分析番葉太喺港島區，主要都係以中產票、大型屋苑嘅選民為支持者，所以佢哋就研究未來點樣加強宣傳，包括多用網上媒體發表文章、同支持者溝通等。新民黨有400幾個黨員，佢哋亦有討論點樣再招募黨員同增加支持者，等日後選舉都有多啲人幫手助選、就唔同議題提供意見等。


除咗討論，佢哋亦有玩遊戲，其中一個係「解人結」，參加者都要交疊雙手，互相手拖手，再合力將「結」解開。平時嚴肅嘅葉太第一次玩呢個遊戲，話遊戲比想像中難；田二少更加話，平時開會大家可以雞啄唔斷，但玩遊戲就變得雞手鴨腳，睇怕日後都要多玩遊戲喎。