CY選特首用剩361萬蚊

【明報專訊】CY因為漏報選舉開支，噚日根據《選舉條例》喺高院申請修訂，原來佢計少咗11.4萬蚊開支，法官亦相信佢只係無心之失，所以批准咗佢嘅修訂。


根據庭上披露嘅最新數字，CY總共收咗1492萬蚊捐款，最後用咗1131萬蚊，並無超過選舉開支上限嘅1200萬蚊，至於用剩嘅361萬蚊已經全數捐晒畀公益金。


雖然只係修改選舉開支，改一個數字，但CY都請咗兩位大律師代表上庭，包括一直喺選舉呈請代表佢嘅莫樹聯，律政司亦「隆重其事」，搵咗資深大律師何沛謙代表，估計訟費開支都唔慌會平。