中大開星巴克 學生會杯葛

【明報專訊】近年有唔少飲食集團進駐大學校園，中大善衡書院最近有咖啡店開業，主力賣星巴克產品，有學生喺網上發起杯葛行動，話中大一向關注人文關懷，反對剝削咖啡農嘅星巴克進駐咁話。


間咖啡店喺善衡飯堂入面，屬於有星巴克經營權嘅美心集團旗下。Emily聽講，中大學生會同善衡方面，舊年底就事件溝通，當時院方回應話未必賣星巴克咖啡，但家眼見星巴克進駐，中大學生會就話要杯葛，會長楊政賢話，其實有好多公平貿易咖啡可以選擇，未來繼續喺校園派傳單嗌咪，等同學關注事件。


可能為此事舉行公投

善衡書院學生會長駱其希話，學生會立場係尊重善衡學生民意，佢哋上月搞過一次非正式意向調查，大部分填表嘅同學都贊成售賣星巴克咖啡，學生會有將意見轉交美心。家見同學表示調查唔夠公信力，學生會計劃搞公投，下周一諮詢，若到時大部分善衡同學係反對賣星巴克咖啡，學生會就會要求美心撤回星巴克產品咁話。