慈善跑梯挑戰100層ICC

【明報專訊】Emily年初介紹過，全港最高大廈ICC（環球貿易廣場）100樓嘅天際100香港觀景台，免費請屬龍嘅朋友上去欣賞維港全景，唔少龍仔龍女上去睇過都讚不絕口。但係唔係屬龍嘅朋友唔使灰心，家有機會喇！


新鴻基地產同公益金合辦ICC跑樓梯大賽，幫公益金兒童及青年服務籌款。參加者要由ICC地下開始，挑戰全程2120級樓梯，登上ICC100樓，冠軍當然有大獎，而參加者只要跑足全程，肯定有一份安慰獎，就係可以企喺天際100香港觀景台，360度飽覽維港無敵海景。


幫公益金兒童青年服務籌款

香港摩天大廈唔少，好似怡和大廈、中環廣場、國際金融中心，以前都搞過跑樓梯活動，今次係首次喺ICC跑樓梯，雖然ICC嘅梯級比起對面海IFC嘅2500級少，但一樣考腳骨力。


比賽會喺12月2號舉行，夠fit嘅朋友，可以試下參加個人賽，挑戰極限；擔心一個人一對腳跑唔晒100層嘅，可以諗吓搵多3個朋友組隊。各位健兒即日起可以上大會網頁www.VerticalRunHK.com報名，11月2號截止，名額有限，報名快手。