新民黨廖潔明 為新工退出政壇

【明報專訊】曾經做過警務督察協會主席嘅廖潔明，上年退休後加入新民黨，仲為該黨喺觀塘翠翔出戰區選，最終戰敗而回。廖sir服務呢個社區一段時間後即將離開，噚日同30幾位街坊食下午茶，為佢同個辦事處farewell一番。


新民黨主席葉劉淑儀噚日都有同班街坊傾偈，佢大讚廖sir推動社區發展不遺餘力，退休後放下身段參選區議會，但廖sir因另有發展而要暫別新民黨，新民黨亦因資源有限，暫時關閉油塘辦事處。


廖sir好唔捨得班街坊同辦事處。Emily噚日問廖sir有咩新動向，佢就話因為未完成程序，唔可以公開住，但就因為嚟緊嘅工作需要絕對政治中立，所以唯有退出新民黨。至於日後會唔會再參選，佢就話始終搵工唔係輕率決定，份工亦唔係合約形式，雖然never say never，但可見將來都未必會再做政治工作咁話。