盛品儒撐集會唔係爛騷

【明報專訊】亞視周日直播自家反對增發電視牌照嘅集會，成班亞姐亞男參選人大跳「江南Style」，高層仲帶領員工高叫「否決」口號，惹嚟近2000宗投訴。呢個節目外界劣評如潮，但亞視執行董事盛品儒噚日話，節目娛樂性非常豐富，好多「亞洲會」會員同市民都有支持，唔覺得係「爛騷」，直播係「合法、合情、合理」咁話。


一向直播「重大事件」

盛品儒噚日出席亞視節目《感動香港》評委投票日記者會後，話反發牌集會係亞洲會嘅「重大事件」，亞視一向都直播重大事件，所以做法「合法、合情、合理」。


佢仲話，呢個集會係以娛樂包裝訴求，呢種係香港言論自由嘅表達方式，表達訴求唔一定要激進，輕輕鬆鬆嘅效果反而更好喎，但亞視暫時冇計劃再搞集會。


不過，下個月立法會資訊及廣播事務委員會開會跟進事件，盛品儒就話自己前日先至知道消息，所以拒絕回應。至於面對咁多投訴，佢就只係話「會處理」。


投訴接近2000宗

通訊事務管理局發言人表示，截至噚日為止，一共收到接近2000宗有關亞視周日集會節目嘅投訴，投訴內容包括歪曲事實、偏頗、誤導大眾、濫用電視頻道同埋公器私用等。


通訊局正按既定程序處理投訴，稍後有結果就會公布。