象哥蟹宴 有得請無得食

【明報專訊】呢排仲係食大閘蟹嘅好時節，進出口界議員、民建聯黃定光（象哥）噚日拉埋佢所屬嘅中華出入口商會（簡稱中出）會長莊成鑫，一齊請記者食大閘蟹。雖然中出係商界，莊成鑫噚日就表明佢好支持實行標準工時，仲話無良老闆畀雞碎咁多，唔可以要員工加班、但又唔補水畀人。作為商人，莊會長話員工開支其實唔算最大，最影響佢哋嘅始終都係租金。


中出會長撐打工仔

自從梁振英上台，中出晉身5大商會行列，原來佢哋喺嚟緊嘅人大代表選舉，亦有唔少人有意參選。象哥話，中出將推薦副會長張明敏參選，另一個副會長陳仲尼亦有意以青聯嘅身分參選，佢哋一定全力支持。


象哥噚日同記者食飯，雖然佢老婆下令唔畀佢食大閘蟹，但佢仍然笑到見牙唔見眼，原來佢孫仔前日出生，第二次做爺爺，唔怪得咁開心。