建築師學會：東北發展要人性化

【明報專訊】新界東北新發展區引起爭議，好多受影響村民都話到最後一刻先知自己條村要拆。建築師學會噚日同傳媒午宴時，都狠批政府諮詢工作做得差，當中學會成員羅建中更直指政府喺今次諮詢已經誠信破產，令社會唔相信發展新界東北係為本港長遠住房需要，呼籲政府要改善整個諮詢程序。


斥諮詢做得差 應少建大商場

建築師學會會長林光祺話，支持政府增加公營房屋比例，但認為政府亦都要平衡公私營房屋單位嘅數目，以避免成為第二個天水圍。佢話政府應該減少發展農地，盡力畀佢哋維持原區耕種；又建議政府要「人性化發展」，減少喺新發展區建大型商場，反而應該鼓勵更多小商戶進駐，以維持當地社區特色同城市景觀。針對未來多個新發展區即將規劃，建築師學會將成立「社區發展關注組」，希望同市民合作推動社區發展同規劃。


香港鬧地荒，但政府預留多達932公頃「鄉村式發展」土地作丁屋發展，林光祺認為喺土地資源咁緊絀下，政府係時候重新檢討丁屋政策。