張炳良落區整損手

【明報專訊】運輸及房屋局長張炳良（圖）噚日喺立法會獲唔少議員慰問，皆因佢上星期落區探訪中轉屋時唔小心仆親，左手手掌擦損晒，所以包紮住去立法會回應議員質詢。張炳良話要兩三星期先會好啲，家冲涼要戴膠手套。


張炳良見記者咁關心佢隻手，就親身示範點樣跌到。佢話當日睇完中轉屋後發覺太陽好猛，想拎副太陽眼鏡出嚟戴，點知睇唔到前面有條矮柱，結果成個人撞咗埋去跌低咗，佢本能反應就係用隻手撳住個地借力，於是手掌就甩皮，搞到要去睇醫生兼打破傷風針。但張炳良樂觀，話好彩唔係整親右手，否則筆都揸唔到，至於有無因為傷咗而叫議員手下留情？佢話其實議員已經手下留晒情喇。