謝偉俊立選收7.9元捐款

【明報專訊】好多人都關心喺立會選舉報稱「獨立」、「無政黨背景」嘅候選人，選舉資金喺邊度嚟，立選時被指係「西環契仔」嘅謝偉俊早前喺選舉開支申報表中，報稱開支112.4萬，但只係收咗7.9元捐款。謝偉俊報稱呢啲捐款，係來自佢早前同115個候選人一齊參加嘅「健康空氣行動」活動；至於有冇收過其他捐款，阿Paul喺申報表就無交代嘞。


梁美芬收3企業家55萬

相反，梁美芬選舉使咗84.7萬元，坦承收咗55萬元捐款，據選舉事務處資料，佢嘅捐款分別來自陳頴、程燕同劉金杯3個人，佢早前接受本報查詢時，稱3人係「識咗好多年嘅企業家」，冇任何政治背景。


剩低嘅開支係咪阿Paul同梁博士自己拎出嚟？Emily噚日打過畀阿Paul同梁博士，但佢兩個冇聽電話，由於佢哋得票多，又有12蚊一票嘅政府資助，相信要倒貼，數額亦唔大。


另一報稱獨立候選人嘅白韻琹就獲67.4萬元捐款，捐款人包括兩間鮮果公司，最大筆係Chow Koon Mei捐出20萬元，由於白姐姐選舉開支達250.1萬，得票少，估計倒貼唔少。