職訓局籌款

【明報專訊】香港對上一次出現滿漢全席已經係1977年，當時都有108道菜，Emily聽聞職業訓練局（VTC）下星期五會喺中華廚藝學院擺10圍模仿滿漢全席嘅晚宴，盛惠15萬一圍，為VTC學生發展基金籌款外，亦希望將幾近失傳嘅大場面再現香江。


15道菜新煮法 有分子料理

Emily噚日滿心歡喜諗住去見識，VTC副主席鍾志平就話呢餐只係「仿滿漢全席」，選取其中15道菜式，當然唔會有猴子腦同熊掌，亦都無翅以支持環保。不過，當中名菜如「雁塔題名」、「揚名四海」係啲乜、有乜材料就話要賣關子，但就會用嶄新方法演繹菜式，包括分子料理烹調。係咪可以承傳中華飲食文化，真係要拭目以待。


百學生幫手 學雕筍兩個月

餐飯會有近百名學生幫手煮，噚日VTC安排10名同學仔示範點樣雕刻「雁塔題名」嘅伴碟裝飾甘筍塔。學生鄺穎琪話佢哋已經練習咗兩個月，中通嘅塔身可以放入燈泡發光，塔頂有個立體「中」字代表中華廚藝學院。