長毛18蚊一票當選

【明報專訊】立法會選舉嘅候選人申報開支內藏玄機，足以睇到佢哋嘅選舉策略、路線、人脈，甚至性格。Emily嚴選幾名「候選人之最」，等大家睇吓選舉背後嘅趣事。


長毛選前同Emily講，「最窮政黨」社民連喺愈趨企業化嘅選舉根本唔夠人玩。不過，佢今屆以全區最低成本88.8萬元，喺全港第二大選區新界東膺票王，得4.8萬票，平均一票18元。長毛用最基本嘅「宣傳3寶」﹕海報、橫額同傳單，報章廣告只賣咗3次。被問到點樣「刀仔鋸大樹」，長毛講笑咁話，「香港人要揀我都冇計」。


長毛舊戰友人民力量黃毓民同陳偉業分別使咗124萬同116萬，大部分由人力同普羅政治學苑捐贈。兩人特別鍾情喺報紙落廣告，又花咗6000幾喺YouTube宣傳。


最貪靚﹕公民黨

冇錯，最貪靚就係公民黨班大狀，湯家驊用1500元化妝，又用51元買卸妝油，但都唔夠黨魁梁家傑重本，傑哥總共用4500元set頭兼化妝，仲貴過女候選人。至於郭家麒同余若薇團隊，亦買咗支54元嘅淨白修護乳液。


最大頭蝦﹕新民黨田北辰

富貴嘅田氏兄弟，四捨五入後，恰巧同樣用咗233萬。不過，田北辰似乎幾大意，佢錯印24萬張單張，全部唔用得，無咗3萬幾，另外又印錯8000張號碼貼紙，嘥咗約1.3萬。


最常犯罪﹕陳國強

陳國強喺新界東低票落選，用咗7.8萬元，但當中1.2萬竟然係交罰款。陳國強總共收到31張告票，話佢亂掛橫額。


最強僱主﹕陳強

涉及賄選案嘅新西落敗候選人陳強，總共豪花191萬元，當中50萬請選舉助理同拉票人，其中嘅29萬係請鐘點兼職負責掛橫額同派單張。佢又多次向義工提供膳食，投票日就用咗6.4萬請約2000人次食嘢。


另外，Emily噚日話民主黨涂謹申可以取得政府共379.7萬元選票資助，但其實法例規定，政府會資助每票12元或申報開支嘅一半，以較低者為準，所以用咗386萬嘅阿涂，最終只可取得193萬資助。