劉燕卿榮休黃鳳嫺掌消委

【明報專訊】今日展開退休生活嘅消委會前總幹事劉燕卿（Connie），噚日最後一次以總幹事身分主持《選擇》月刊發布會。消委會副主席何沛謙會後話有「驚喜」送畀Connie，氹得Connie好開心咁問：「出雙糧？」其實係一班委員同職員預備咗盆花同蛋糕歡送佢。Connie一向深受記者歡迎，Emily同一眾行家爭住同佢影相留念。


至於新任消委會總幹事黃鳳嫺（Gilly）今日履新，由旅發局過檔嘅佢話，近排同消委會委員密密開會，相信新舊總幹事嘅工作可以順利交接咁話。至於10月開始懸空嘅副總幹事位，消委會噚日宣布委任現時嘅法律事務部主管徐振景頂住，出任署理副總幹事，同總幹事一樣喺今日生效，為期半年。