中策組新貴無人識

【明報專訊】政府日前宣布委任做過金融管理局嘅何燕飛出任中央政策組全職顧問。不過，前任金融界議員詹培忠同現任嘅張華峯都話唔識佢，就連身兼行會成員嘅新民黨葉劉淑儀亦大呼奇怪；泛民亦質疑中策組係唔係「梁粉安置所」，反對梁振英委任名不經傳嘅何燕飛入局。


曾任職金管局 葉劉：非常神秘

根據政府新聞稿，何燕飛係「經濟金融專才」，曾任職金管局同美林集團，對內地發展有豐富經驗。不過，葉太噚日話完全唔知何燕飛係邊個，覺得佢「非常神秘」，對佢獲委任感到奇怪。


阿人批中策組黑箱作業

葉太又話，中策組首席顧問邵善波曾講過，未來有意研究多啲網民意見，亦計劃喺全港400幾個諮詢委員會物色人才，但佢就覺得，要研究網上民意，應該搵個熟上網嘅人先至啱；至於喺諮委會搵人才，由民政事務局負責，亦會比中策組恰當喎。


工黨李卓人話，何燕飛連業界都冇乜人識，完全唔知佢對香港有乜貢獻，質疑梁振英當中策組係「梁粉安置所」，隨便安插人落去咁話。佢又批評中策組向來透明度低、黑箱作業，講明下星期必定會喺公務員及資助機構員工事務委員會跟進。