民記齊屈家洛醉酒投票

【明報專訊】公民黨陳家洛同民主黨黃碧雲疑似投錯票嘅風波仍未平息，話說多名泛民議員噚日要求內會主席梁君彥，以後宣布表決結果前，預多啲時間畀議員核對結果，又希望秘書處完善投票系統，以免「悲劇重演」。但就畀建制派反駁佢哋投錯票賴晒秘書處職員，民建聯更突然話家洛當日係帶醉投錯票，搞到議事廳都嘩然。


呢場「老屈戰」由民建聯嘅陳恒鑌帶起，佢唔點名咁話，如果議員「食咗藥、飲咗酒」，都有可能投錯票。蔣麗芸即時接上，話有人當晚經過家洛旁邊，聞到好大陣酒味，仲見到佢面紅紅，要求家洛自己承認醉酒投錯票，黃定光亦有附和。


家洛譴責無中生有

「被告」家洛嚴辭否認，更發新聞稿譴責二人無中生有、肆意抹黑，要求佢哋致歉。睇唔過眼黨友被屈嘅毛孟靜更離場抗議，但大家都知佢逢星期五都要返中大教書，佢一走，即刻畀蔣麗芸窒：「咁就叫離場抗議呀？」


議會一場混戰，但內會噚日喺冇人投錯票下，終於以32對26票，通過今個月28日休會辯論行會成員林奮強事件，算係有啲建樹。