CY柯打：官外訪要探當地港人

【明報專訊】政務司長林鄭月娥噚日終於完成歐洲外訪番嚟，佢呢次去咗英國同西班牙，短短6日跑咗超過20場活動，但都要抽時間見見當地留學生同埋港人。林太好識做咁話，呢個係特首梁振英（CY）下達嘅指示，CY要求每一次主要官員外訪，都應爭取同喺當地定居、就業和讀書嘅香港人會面，關心佢哋，聽吓佢哋對香港最新發展嘅意見，所以日前喺倫敦百忙中都要咁做。


林太喺12至17日訪問倫敦、馬德里同巴塞隆拿，噚日一到機場就即刻為長者生活津貼政策護航，顯然佢雖然人在海外，但對長津喺立法會拉鋸一事都瞭如指掌。


林鄭外訪6日踩20場

佢又特別提到喺倫敦除咗見官商政要介紹香港政經情况之外，仲參觀當地一啲文化機構，佢話因為香港會有西九文化區，希望同當地文化藝術機構同培訓機構，商談未來幾年有乜嘢合作契機，希望對方可以喺軟件同人才培訓上幫助香港。