《寒戰》影射曾蔭培？

【明報專訊】講及警隊高層權力鬥爭嘅電影《寒戰》，近期成為Emily及唔少行家茶餘飯後嘅話題，而曾任保安局長嘅葉劉淑儀，前日以「過來人」身分評價該戲嘅「影評」，分量非同小可，自然引起談論。唔知係咪同好多人喺facebook share葉太嘅睇法有關，葉太噚日食過翻尋味，再評此戲，仲暗指前警務處長曾蔭培，都好似劇中郭富城飾演嘅副處長咁，擅長 「整靚盤數」！


指似郭富城副處長角色

「影評人」上身嘅葉太話，其實兩名副處長喺升級上有競爭，的確係時有發生嘅事，其他紀律部隊相信亦有所聞，大家唔使咁大驚小怪。葉太話，戲中扮演廉署人員嘅李治廷，曾揶揄郭富城「升得咁快，識得整靚盤數」， 喺某程度上確係該職位嘅「現實情况」；又話一名曾任職副警務處長（管理） 上位嘅「曾姓處長」，擅長「整靚盤數」，仲話「剛巧電影中的處長亦姓曾，未知有否影射之嫌？ 」


稱「整靚盤數」屬當年任務

葉太話，喺梁錦松擔任財政司長期間，政府搞資源增值要慳錢，仲要嚴格控制支出增長，「整靚盤數」確係當時要「執行」嘅任務之一。