林鄭率政界撐三十會酒會

【明報專訊】2003年成立嘅青年專業人士論壇組織「三十會」，話咁快就成立咗9周年，佢哋噚日別樹一格喺中環一間咖啡店舉行酒會，地方細細，但就逼滿政經界人士。出席者嘅政治光譜相當闊，由民主黨、公民黨，到民建聯、新民黨、自由黨都有出席。政府更係相當畀面，政務司長林鄭月娥主禮，多名副局政助、中央政策組顧問，以及行會成員都有到場。


勞工及福利局政治助理莫宜端早前未獲政府「續任」期間，曾以三十會成員身分登報反對國民教育科。佢噚日重返三十會，話政府對佢咁做並無微言，佢話自己當時係以公民身分登報，目的只係想公民社會同政府多啲溝通，同佢家嘅崗位並無衝突。佢又話，港人認識國家同關懷國家係理所當然，佢只係希望政府推行國教嘅方式可以更好啫。


論政組織 「鑽的」屬得意作

Emily喺酒會上遇到好耐冇見嘅自由黨前主席劉健儀（Miriam），喺今屆立會選舉連任失敗嘅Miriam，現時全職做番律師，但仍然有幫手做議會工作幫黨友，最近忙緊為嚟緊嘅人大選舉備戰。佢仲講笑咁話，今次嚟三十會酒會，係拉票嘅好機會喎。


外界好多人唔知三十會係乜，有人仲講錯做「三合會」，其實三十會除咗係論政嘅組織，仲積極參與社企工作，其中專門接載傷殘人士嘅「鑽的」，就係佢哋嘅得意之作。