各黨紛搶貓狗客

【明報專訊】順利邨虐貓案人神共憤，各政黨都趁呢個契機要求政府推動保護動物政策。民主黨噚日將前主席何俊仁同愛犬「豬仔」嘅合照製作成海報，要求政府盡快設立動物警察，仲話「豬仔」會「伸脷支持」。唔少網民見到「豬仔」咁可愛嘅嘜頭，都忍唔住轉載，仲大讚佢上鏡喎。


何俊仁推動物政策 擺愛犬上枱

民主黨一直跟開動物政策嘅元朗區議員鄺俊宇話，目前已收到逾百張港人為寵物拍嘅相，今日將會喺旺角行人專用區展覽，順便收集市民嘅簽名，要求政府設立動物警察同提高虐待動物嘅罰則，同時亦會做網上聯署，目標係收集1萬個簽名，喺嚟緊嘅星期日去警察總部交畀警方。


防止虐待動物呢個議題煲得咁㷫，其實公民黨毛孟靜同民建聯陳克勤亦一齊做緊。Emily希望喺泛民同建制聯手下，可以逼到政府做嘢保障動物啦。