新聞類別
港聞
詳情#
【明報專訊】最近屋企附近多咗人練跑？梗係啦，渣打香港馬拉松仲有3個幾月就舉行嘛，主辦單位話今年報名速度創下紀錄，10公里賽1個半小時就爆滿！為令參加者更充足準備，大會今年新設專家團隊喺網上專頁解答大家練跑嘅奇難雜症。
渣打香港馬拉松籌委會主席高威林話，賽會為令大家唔會唔記得報名，特登比以往提早個幾月宣傳，結果報名速度同參加人數都創紀錄，整個馬拉松嘅3項賽事就一共吸引咗7.2萬人參加。
近年馬拉松都出過事，為令參賽者尤其係「忽然熱愛跑步」嘅參加者有一定準備，主辦單位今年首度喺facebook設立一個解答各式跑步疑難嘅環節，逢每月第二個星期三，有一個由12名專家包括心臟科醫生、教練等組成嘅小組，喺網上解答有關自我身體檢查、熱身運動、訓練計劃等問題。
■www.facebook.com/hkmarathon
回應 (0)
