發叔窒何君堯樹大有枯枝

【明報專訊】屯門鄉事委員會主席何君堯前日帶領約100個村民向鄉議局主席劉皇發抗議，成班人仲諗住衝入會議室引起衝突。發叔噚日被記者問到何君堯係咪搞事時，就乘機揶揄對方，形容鄉議局「樹大有枯枝，村大有乞兒」，仲話每個人都有自由，何君堯都係按法律搞事。


面對咁多示威，但發叔就表明「驚都未驚過」，形容佢哋都係「尋求刺激」，佢話鄉民水平唔高，對僭建申報事件認識唔深，所以會人云亦云，仲話唔介意被人鬧，表明「鄉民發泄完就算，佢哋要舒服吖嘛」。


雖然鄉民內部出現矛盾，但鄉議局成班執委成員噚日就去見特首梁振英，表達對施政報告嘅意見，鄉議局副主席張學明會後話，認同丁屋政策係適當時候傾吓，但佢哋就無畀具體意見，至於新界東北發展，鄉議局就認同政府做法，將東北當成傳統新市鎮咁發展，但過程中亦要顧及持份者利益。