誠哥曾被相士批難發達

【明報專訊】長實主席李嘉誠嘅奮鬥史大家都聽過唔少，膠花廠起家更係曉背咁滯，但誠哥噚日就自爆童年往事，話自己曾被相士批「眼眸無神，骨架瘦弱，未來恐難成大器」。當然誠哥唔信邪，憑雙手打造出自己嘅成就。


14歲被批「恐難成大器」 媽媽安慰

誠哥噚日出席北京長江商學院10周年慶典致辭時，由自己個古仔講起，佢話14歲嗰年，一個會睇相嘅同鄉對佢媽媽講：「你兒子眼眸無神，骨架瘦弱，未來恐難成大器。他安分守己，終日乾乾，勉強謀生可以，但飛黃騰達，怕無福分。」


呢番話雖然搞到誠哥阿媽好唔開心，但李媽媽仍安慰鼓勵佢：「阿誠，天命難算，上天一定會厚待善良、努力嘅人。再艱難，只要一家人相依一起就不錯啦。」誠哥當然唔認命，只信自己雙手能創造未來。


講到呢度，誠哥開始講佢嘅人生哲理：「天命和命運係唔同嘅。明天只係新嘅一天，而未來係自己喺一生各種偶然性中，不斷選擇嘅結果。追求自我，努力改善自己係一股正面嘅驅動力……知識、責任感同目標融會成智慧，天命不一定係命運嘅藍圖。」


佢仲話，「人最大的悲哀係無聊……嗰啲沉醉喺過往，滯留喺今日，對社會問題視而不見、無動於中嘅藉口大王，一定被社會唾棄和淘汰」。誠哥請在場嘅學生要有承擔社會嘅責任，希望每個同學緊守正知、正行、正念，兌現自己承諾，建立同守望未來。