劉健儀做自由黨榮譽主席

【明報專訊】唔少政黨換屆都會相當大陣仗，預早邀請傳媒採訪，至少都會放吓風，等外界有心理準備佢哋將有人事變動。不過，自由黨噚晚就失驚無神突然向全港傳媒發新聞稿，話喺噚日嘅特別常務委員會上，一致通過委任因立法會選舉失利而辭去黨主席嘅劉健儀（Miriam），出任榮譽主席。


其實，田北俊喺2008年選舉失利後，同樣榮升為榮譽主席，所以自由黨目前計埋Miriam已有兩位榮譽主席。至於順利重返立法會嘅田少，則會兼任自由黨嘅發言人。


已啟動選舉主席

講咗咁耐，究竟自由黨嘅正、副主席係邊個呢？自由黨就話，佢哋黨內部已經啟動正、副主席嘅選舉，預計下個月內會公布結果。