釣魚臺國宴香港有得食

【明報專訊】北京釣魚臺國賓館嘅國宴只供領導人同外賓品嘗，不過，今日起嘅一星期，負責烹調及提供國宴嘅廚師同服務員嚟咗香港，喺跑馬地馬會會所獻藝。Emily噚日見到呢批廚師同服務員，後者更披露，佢哋衣著造型除咗一式一樣，工作時笑容唔可以誇張，即使畀人遮住個嘴，都要見到歡顏咁話。Emily心諗，呢個咁高難度嘅表情要求，真係要受過訓練先至做得掂！


服務員：遮住嘴都要見歡顏

釣魚臺國賓館行政總廚郝保力今次帶咗8名廚師同9個服務員嚟香港。由於服務員要接待領導人同貴賓，儀容肯定要一絲不苟，髮飾全部統一唔過頸，制服同皮鞋一式一樣，難怪領隊經理韓梅話，嚟到香港成日聽到有人話「點解服務員嘅樣貌全部一樣？」


秘製湯煮20個鐘 北京運港

服務員仲同Emily分享「國家機密」，例如佢哋工作時遇到高官同領導人傾緊偈，上菜時要識趣避開。韓梅仲話，接待各國貴賓前，服務員要先了解清楚賓客嘅特性，例如美國總統奧巴馬係左撇子，國賓館要將佢嘅所有餐具放喺左邊，唔好失禮。


當然，國宴級菜式至係主菜，郝師傅專誠將佢嘅秘製上湯由北京運嚟香港，聽講呢煲清雞湯起碼要煮20個鐘。郝師傅佢哋今日起一連7日獻藝，只招待馬會會員。