人大選舉激烈 「展昭」也拉票

【明報專訊】大家仲記唔記得邊個係何家勁？無錯，就係內地劇集《包青天》中飾演包公保鑣「展昭」嘅何家勁。Emily噚日喺會展見到佢，差啲以為佢轉行做咗保鑣，但原來「展昭」現身，唔係為拍戲，而係為香港工商總會會長王庭聰拉票！


何家勁撐王庭聰

今屆港區人大選舉競爭激烈，噚日係港區人大舉行簡介會，王會長同一眾新人又點會放過呢個拉票機會。至於「展昭」點解會幫王會長拉票，原來「展昭」同王會長合作健康食物生意。王會長都幾有面子，佢單張入面，仲有同已故藝人梅豔芳嘅合照！


同樣咁「威武」嘅仲有前保安局長李少光（Ambrose），佢噚日都係為自己參選港區人大而來。不過，佢嘅「保安工作」就似乎要改善嘞，皆因Emily噚日「裝」到佢同記者派卡片，上面除咗有手提電話號碼，仲有埋住宅地址。


似乎Ambrose選情唔錯，皆因Emily只係喺簡介會前見佢拉票，簡介會後，喺其他新人嘅拉票區就無見到佢。加上Ambrose噚日有佢嘅前下屬、前保安局長新聞秘書冼錦甜坐鎮，仲做埋Ambrose新聞官個位，仲唔係如虎添翼？