內地青少年諾貝爾6港生奪獎

【明報專訊】香港學生除咗讀書，做科學研究嘅能力都唔錯，最近6名學生代表香港出戰被譽為「內地青少年諾貝爾獎」嘅「明天小小科學家獎勵活動」，奪得兩個二等獎同4個三等獎。比賽上星期喺北京進行，共有579個研究項目參賽，先由180名學者選出入圍作品，然後再評選獎項，今次港隊獲獎一啲都唔容易。


參賽嘅學生先要通過港區比賽，咁至可以代表港隊出戰全國賽。喺全國賽獲二等獎嘅包括來自聖保祿學校嘅林遠怡，佢憑研究如何利用海鮮吸附海水污染物奪獎；另一個獲二等獎嘅係順德聯誼總會翁祐中學學生朱曼婷，研究嶄新骨材料如何在體內使用的可行性。


獲三等獎嘅包括喇沙書院何朗曦、裘錦秋中學（元朗）李勇斌、聖保祿學校黃熙雅，以及迦密柏雨中學鄧卓賢。