人保路演爆滿 牛央豪言落注1億美金

【明報專訊】大大隻嘅人保（1339）搞路演，一嚟就整招「眾星拱月」畀大家嘆吓。小琴噚日去到酒店，見到有成17間投行幫佢護航，場面非常「墟冚」，成班「賓架」、「芬佬」都要企喺度等入場，呢啲咁嘅場面，近排真係好少見。


話說今次已經係筵開30席，但係都唔夠位招呼咁多人，唔少「賓架」啲馬仔，都要喺出面同班記者企埋一齊。


最搞笑就係佢哋想攞本初步招股文件都難，以往呢啲「大字典」通常多到派唔晒，但小琴就見到有個「賓架」問極啲公關都冇，最後好無癮走咗，聽講今次路演每間投行最多都係得5本咋。


眾星拱月之餘，噚日仲有「牛人」撐場，西京投資主席劉央「強勢」回歸新股路演。佢一出場就話，人保好又平，比平保好得多，仲要即場落埋單，大拿拿成億美金咁話。