東鐵廣播提「留意高低」

【明報專訊】「乘客請勿超越黃線，上車時請小心月台與車廂間之空隙」，東鐵呢句廣播可謂港人集體回憶，尤其係每日搭東鐵返工返學嘅巿民，可能連發夢都背得出。不過，有朋友話畀Emily知，近日搭東鐵嗰陣，聽到嘅版本改咗為「上車時請留意車廂與地面的高低」。修讀語言學嘅朋友覺得文法有啲騎呢古怪，唔通舊日「留意空隙」嘅溫馨提示已消失？


港鐵回覆話，其實部分東鐵站一直都有廣播，提醒乘客要注意車廂與月台之間嘅「水平」，只不過最近擴展至東鐵全線。


東鐵有幾個站都出咗名空隙大，大學站條隙真係成個人都跌得落去。上星期日晚（18日），一個女乘客就叉錯腳失平衡，誤墮月台空隙。好彩佢識得匿喺月台邊路軌旁「保命位」，逃過一劫。