民主黨游月華幫人選人代

【明報專訊】今個月初沙田一個區議會補選，民主黨游月華僅以45票落敗，搞到該黨黃碧雲好激氣，一度喺facebook話「要多謝一眾民建聯B隊」，引起爭議。不過，游月華本身亦有爭議事件，近日傳媒收到佢發出題為「顏寶鈴女士參選港區人大代表選舉」電郵，為對方公布幾時報名，希望傳媒採訪，換句話說，即係游月華幫人搞選舉嘅事。


Emily噚日未能聯絡游月華，睇番資料，游月華係做公關，今次或者係幫人做宣傳公關工作掙取收入。不過，民主派一直唔承認人大代表呢個小圈子選舉，今次亦唔會派人參選，游月華既然選擇從政加入民主黨，係咪都要犧牲一下，唔應該接呢類工作呢？


立會昨變拉票場

人大選舉今日展開報名期，報名者要取得10個選民提名，每個選民都有印晒號碼嘅提名表格，所以噚日唔少立法會建制派議員喺開內委會期間，互相簽署表格。正當民主派質疑中央政策組嘅工作時，葉國謙、馬逢國等拎住張粉紅色提名表周圍走，工聯會麥美娟亦為黨友去問民建聯友好拎提名。