尤建中任北區專員 小Donald轉勞福局

【明報專訊】各區民政事務專員都要同地區人士打好關係，有啲地區問題複雜嘅，更加考驗專員嘅能力，做過特首辦助理處長（傳媒）嘅北區民政事務專員陳羿，做咗超過3年後功成身退，轉到勞工及福利局做副秘書長，負責長者生活津貼同綜援等惹火議題。而佢個位，就由商務及經濟發展局首席助理秘書長尤建中接手。


尤建中1995年加入政府，先後喺政務司長辦公室、前政制事務局及前衛生福利及食物局等多個部門做過。至於人稱「小Donald」嘅陳羿，家休假中，下月10號正式返工，究竟到時長者生活津貼撥款係咪已通過，定係佢要接呢個燙手山芋，真係不得而知。