唐唐促維護婚姻核心價值

【明報專訊】TVB「新聞王子」林子豪，前晚同《蘋果日報》政治行家許偉賢結婚，結束6年愛情長跑，由於兩人都係跑政治新聞嘅資深行家，所以佢哋嘅婚宴當然有唔少議員、官員做座上客，而前政務司長唐英年、立法會主席曾鈺成等更加拍片講幾句祝賀說話，場面搞笑，全場拍掌歡呼。


新聞王子娶行家 「吊吊揈咗6年」

一對新人好有心思，搵咗好幾個政界人士「講清講楚」，好似曾鈺成就話好高興見到年輕人結婚，因為咁樣年輕人會變得無咁激，話唔定會支持埋建制派。至於新民黨主席葉劉淑儀就引用當年名句，話「要放長雙眼」睇兩人早生貴子。


不過最令在場人士驚喜，相信係連唐英年都粉墨登場，唐唐引用晒佢金句，話林子豪追老婆追6年先追到，「吊吊揈6年」，所以記住要生生性性，「千祈唔好呃佢，否則會一錯再錯」，唔好有任何「缺失」，又話「呢個核心價值亦係婚姻核心價值，呢個核心價值要維持、維護」咁，令全場人都拍手叫好。


泛民建制開懷飲


除搵政界人士拍片之外，一對新人仲用六合彩票做回禮，唔少行家都好受落，噚日攪珠後司儀仲宣讀結果，等賓客立即核對。


而出席者方面，亦算做到泛民建制大和解，無論係自由黨田北俊、張宇人，民建聯葉國謙，定係民主黨張文光、李華明，公民黨陳淑莊等，都食到最後先走，一齊暢飲得好開心。