陳淑莊即將復出

【明報專訊】公民黨陳淑莊（Tanya）喺9月立法會選舉港島區落選，之後靜咗一陣子，不過，佢嘅黨友陳家洛話Tanya應該好快會復出，該黨有意安排佢哋兩個喺港島「行孖咇」，即係兩個人一齊喺港島工作，部署定4年後兩個人喺港島分拆兩張名單單獨參選。


與家洛港島行孖咇

家洛同Tanya呢屆以同一名單出選港島，攞到7萬高票，但喺比例代表制下都唔足以令兩個人同時入局，排第二位嘅Tanya落選，至今唔少人都話可惜。不過，家洛就話Tanya仍然好熱心社會服務，而公民黨12月1日就改選領導，同樣落選嘅余若薇同埋Tanya，相信會眾望所歸分別做主席同副主席。


家洛仲話會同Tanya傾傾喺港島合作行孖咇嘅事，家洛作為港島議員，喺區內有唔同辦事處，而Tanya就會一齊服務。公民黨今次二人名單出選遇滑鐵盧，所以下屆應該要分拆名單，至於家洛同Tanya點分區就未咁快討論。