玩具熊變身黃大仙

【明報專訊】全港18區各有社區特色，最近香港知專設計學院就搞咗個「18區玩具形象DIY設計比賽」，由100個中學生，限時8個鐘內，即時為18隻5呎高嘅大型玩具熊模型上色，展現各區特色。亞軍得主、中五學生陳穎琛就幫玩具熊蓄起長鬍鬚、著上道袍，成為「cute版黃大仙」，陳同學話各區都有自己景點，反而黃大仙以人物命名，「大仙熊」就更突出，佢仲話玩具熊嘅面部表情要細緻，鼻影、眼肚、眼影都要有立體感，事前做咗唔少資料蒐集。


而觀塘中六學生陳麗婷創作嘅「齒輪熊」，利用多個齒輪圖案，模仿昔日工廠嘅機器運作，加上各種面譜畫同抽象畫，象徵觀塘由工業區發展成藝術區，脫穎而出成為冠軍作品。呢批玩具熊11月29日起輪流喺荃灣愉景新城同中環港鐵站展出，下年1月會喺「香港玩具展2013」中展出。