十大欣賞指數 無綫大退步

【明報專訊】免費電視牌照風波鬧得滿城風雨，港大民意研究計劃噚日發表今年度第3階段嘅「電視節目欣賞指數調查」，反映港人對各電視台嘅滿意程度。結果顯示，十大欣賞指數排名最高嘅節目中，香港電台包攬9個，無綫電視大退步，只有《星期日/二檔案》上榜，排名亦大幅下跌。


港台成大贏家 《鏗鏘集》蟬聯榜首

港大民研喺10月8日至25日以電話訪問2063名9歲以上嘅港人，調查發現港台繼續成為大贏家，《鏗鏘集》蟬聯十大欣賞節目榜首，其次係同樣港台製作嘅《沒有牆的世界III》、《頭條新聞》、《警訊》、《華人移民史》等。無綫嘅《星期日/二檔案》同《新聞透視》上季分別排名第2同第3，今季卻只有前者保住第8，後者更跌出20強。


至於自詡為「香港良心」嘅亞視呢？答案係：冇節目打入十強，排名最高嘅《時事追擊》排第16。